LAST LAST, AEDC NO DEY CARRY LAST
No be small
thing Abuja Electricity Distribution Company( AEDC) do for Kogi State
Government House on the 28 of April 2020. The company sey at all at all den no
go fit carry last for the mata wey dey ground so.So dia for, as part of dem
contribution to see sey dem helep government to provide for dem pipol for dis
time wey contiri pipol dey hear nwin sake of the yamayama of Corona Virus, plus
including sey na part of wetin Bukuru pipol dey Call Corporate Social
Responsibility, den still wan let contiri pipol and the government of Kogi
State know sey den stand with dem for dis time of gbeghe wey dis Corona Virus
kon put for ground.
At all at
all, the Ogbonge AEDC Kogi Region bring 400 bags of 4.5kg of Rice, 38 bags of
50kg Beans, 60 bags of 10kg Semovita, 50 gallons of 20litres Red Oil, 5 cartons
wey contain 50 bottles of hand sanitizers plus including 24bags of 12.5kg of
Garri.
Wen e dey
talk, di General Manager, Kogi Region of AEDC, Egnr. Abdumutalib Mohammed kon
let kogi government know sey den no blind to wetin dey go on for the Contiri
sake of wetin the Corona virus dey cus and na bicus of the kain palava of
hungry wey the Corona virus kon put for ground naim maik AEDC bring wetin den
carry come to come help Kogi State government as dem own contribution. E sey
the company don still carry things like dis go other areas to helep dem since
dis Coroviru Palava enter town. The wan wey e talk wen really sweet Kogites
body na wen e sey den dey do plan to put Kogi for the 33KVA Line wey go maik
kogi state enjoy beta light. Engr Abdumutalib mohammed kon salute Kogi state
Government for everything wey den dey do for AEDC work to taik dey waka siwiri
werere.
By the time
im dey talk, the Oga wey tanda for Governor for the occasion, Rtr Navy
Commodore Jerry Omadara kon salute AEDC management for wetin den carry come
taik helep kogi pipol for dis season wey Corona Virus taik dey gbeghe every
where so. E let the Aedc management know sey Kogi state government dey do every
thing to maik sure sey the yamayama no enter kogi. E sey before anything
happen, Kogi state don begin dey use jingles with plenty local language plus
English and pidgin to dey tell im pipol of the corona virua and how den go taik
dey keep den body from the yamayama Corona virus. E still maik the team of AEDC
know sey even doug sey the yamayama never enter kogi, den don prepare Isolation
centres for ground and den get numbers wey den don give dem piopl to call in case dem see any persin or if den get any
sign of the korona virus.
The Hon.
Commissioner for Information and communication, Envg. Kinsley Fawon naim kon
finally do the talk talk of salute before every body carry waka comot the
occasion wey AEDC for kon give dem
COVID-19 Palliative . Government oga dem wey dey the occasion kon be Environment
commissioner, Hon Adewale Omofaiye,
Envg. Kingsley Fawon, DG Protocol, Government House plus including staff of
Government House.
Comments
Post a Comment