UNA HELEP ME SALUTE MAMA TOBORE O

Since wen my wife, Mama Tobore come from travu, im way just change once. Make una come see di way wey e come dey taik dey love me like sey we just marry new. Hmm, something dey tell me sey maik I dey careful for dis kain love o. But as a sharp Warri Man, I do my small investigate.

Fia Women o, I nor know sey before Mama Tobore travu go Warri go meet im younger sister wey born, e don put one of my nebor wife maik e dey Monitor all my waka. Na dat Aproko woman naim kon tell my wife all di things wey dey go on for my house and my life before she come back. Imagine o, my wife dey ask me how service be for di church wey I go, I first tink sey na the Bible wey den give me as first timer wey she see naim maik am know sey I go church, na wen she begin dey down load everything wey hapun from wen I go church tili wen Mufun carry me go see Baba naim I know sey I need to fia Women aproko.

Anyway, to cut a short tori long, she salute me well well and promise me sey im go join body with me for my Vendor Business to work. E sey wetin dey maik me dey tink sey im be gbagbati wife na sake of sey e nor dey happy to see sey im  Husband go waik up for morning, chop den go sidon dey play draft. E nor dey think of im Pikin, Wife plus including family members! But e sey as I don change so and even dey go church join, im happy well well.According to am, e sey im belle na sugar industry now. Oghene Ose!

My contiri pipol I nor know weda una go fit keep dis secret o, but I go tell una.  God is wonderful o. Sebi una know sey Baba tell me many things on how to start di business, Money dey o, I go do big table wey I go put my papers, buy one big umbrella, do one chair wey I go taik dey sidon.

Oh boy, wen I sidon calculate all di money wey I go taik start ehn, di thing go chop reach Fifty Thousand Naira. Tell me wia Oshobey go see dat kain money. All di friends wey I get na… na I beg, maik I forget dat side. So, di thing surprise me well well wey Mama Tobore sey im go give me all di money wey I need to taik start di business of my Newspaper Vendor. Una just dey luk, una na nor fit helep me shout seven Praise thy Lord and Seven Hallelujah! My pipol, God nor dey sleep o. Di God wey do my own for me so go do your own for you too in Jesus name.

Maik una helep me salute my wife and I promise am by di grace of God sey na dis my Vendor business naim we go taik hama. Di next time you go see me na for my Newspaper Vendor Stand wey dey for NTA Round About near Graphic Newspaper.

See you on Wednesday